89.
Ai so pi la s'ha in bota inzenochià
Fifando, e la ga dito: - Pare mio
Se mai in qualche ocasion ve go agiutà,
Consolè adesso el povaro mio fio,
Che dai Greghi xe tanto maltratà;
Feghe, vu che podè, pagar el fio
A l'Atride: fe vincer i Trogiani
E co le pezo andar quei fioi de cani. -
90.
Intanto che cussì la lo pregava,
Teti la barba ghe faceva cara,
E ai zenochi de lu la se russava
Tornando a pianzer la so sorte amara;
Ma el pareva incantà, no 'l ghe badava:
Stufa po in fin la ghe dise chiara:
- Che no possa cavarve una parola!
Volue farme arsirar proprio la gola? -
