Bett. Sorella... ohimè! torna ad ascoltare.
Luc. Coss'è?
Bett. Sorella, mio marìo. 1
Luc. Dov'ello? no lo vedo.
Bett. L'è lu, che l'ho sentìo.
Luc. Ma dov'ello? seu matta?
Bett. Drento da mia Cugnada.
Luc. Dentro in camera?
Bett. Drento.
Luc. Che no ve siè ingannada.
Bett. Ohime! l'è lu senza altro, cognosso la so vose.
Cossa falli là insieme?
Luc. I ziogherà alla nose.
Bett. A no so chi me tegna!.. Serradi dentro insieme!..
Non posso più, Sorella, per carità mazzeme.
Luc. No fazzo sti spropositi. Cascasse el Mondo intiero,
Se no vedo, e no tocco, per mi no me despero.
Anche le recchie inganna, e mi nol posso creder.
Bett. Son sicura, ve digo: ma pur vel farò veder.
Tonina...
Ton. VEgno, Siora da vu. 2
Luc. Cossa voleu ?
Bett. L'ho ditto. 3
Tonina una verigola; ma presto presto, e zitto. 4
Ton. Cossa vorla sbusar? la roba che la cuse?
Bett. La testa, se ti parli.
Ton. Ste tre xe tutte sbuse. parte.
Luc. Se vedo mo anca questa, rason ve dago a vù,
E ve zuro da putta, non me marido più.
Bett. Lo vederè senz'altro; per niente non me affligo,
E quando digo torta, so ben quello che digo.
Ohimei! che tremo tutta, nè posso respirar!
Ton. Son quà colla verigola, che testa hoi da sbusar?
Bett. Lassè pur far a mi. 5
Ton. Perchè sbusar le porte?
Luc. Ghe drento so marido.
