Ton. Aseo, ma de quel forte.
Bett. 1 Andè mo, Siore, a veder, che par che ve minchiona.
Ah mario furbazzo! cognada sfazzadona.
Luc. 2 Diavolo! i xe sentai arente, che se vede.
Ton. La fa finta de pianzer: minchioni chi ghe crede.
Bett. Ah cugnada sassina! marìo, marìo furbazzo!
Luc. Ohe l'ha tolto tabacco. 3
Ton. 4 Ohe! la ghe tocca un brazzo.
Luc. Giusto adesso, Bettina, la s'ha puzà al balcon.
Ton. Giusto adesso baruffa, e lu gha dà un spenton.
Bett. No posso più tegnirme; in bocca gho el velen,
Gho 'l diavolo, anzi gho tutto l'inferno in sen.
No so quel che me fazza; ma sia quel che se vol;
Bisogna che me sfoga, perchè troppo me diol.
Ton. E cossa vorla far?
Bett. Adesso el vederè.
Caenazzo a quella porta de drento no ghe xè.
Colla chiave de dentro senz'altro i s'ha serrà.
E ghe n'è un'altra in casa, che so che averzirà.
Vado a tiorla corrando. 5
Ton. No, Siora, no la fazza.
Luc. No, sorella, tasè.
Bett. No taso, se i me mazza. parte.
Ton. Adesso stemo fresche, per mi me vago a sconder.
Luc. Alfin l'è so marìo: cosa voleu responder?
Ton. Ma, el sior Bortolo è grando, che fa quattro de nù.
Luc. Anch'ello ha da pensarghe. In tre contro de lù.
Ton. Mi ghe netto a drettura el muso a Madamina.
Però vago a provederme d'un sfrogolo in cusina.
Luc. L'è quà la chiave, e adesso no ne lassè nu sole.
Ton. Andavo quà alla scaffa a tior le mie pistole.
Bett. Pian, che no femo strepito. 6
Ton. Debotto che bel quadro!
