Giudita (c. s.).
E ti va a tòrtela. (uscendo) Gnanca che la fusse de zucaro e che i te la podesse magnar.
Bapi (a Vidal).
Go lassà vegnir la Lisa co lu, a pato che la torna subito, e xe un'ora....
Vidal.
Eh! Quiétite, la xe co so sorela, e po ghe gero mi....
Daniel
(è entrato dietro a Bapi e Giudita; è leggermente brillo).
Qui siamo in casa de gente onorata e no gh'è pericoli.
Giudita.
Arè che razza de mario che m'à tocà! El ga bevuo come un sion là da Norma invece de farse dar i soldi de quel maledeto anelo....
Vidal.
Ciapè la vostra carta che mio fio no s'avaria degnà, da resto, de valersene in nissun caso.
Giudita (giubilante).
Dasseno? Ah! Finalmente! Te go nele man e prima che i me cuca un'altra volta ga da passar del tempo. Nobilomo benedeto, lu m'ha dà la vita....
Daniel.
Un momento! Vardar se ghe xe la mia firma: che no i se l'abia tegnua....
