Giudita.
No s'avemo fidà de portarla in Chiesa co sti fredi.
Carlo.
La xe grameta perchè setimina.
Lisa.
Setimina?...
Cecilia.
No ghe badè, che la ga tuti i so mesi.
Carlo.
Come no? L'è nata sete mesi dopo el mio ritorno in famegia! (Cecilia crolla le spalle).
Lisa
(sempre con molta grazia e brio).
Oh!... Cara quela frégola! Sentistu, Bapi?... Setimina! e nualtri che se contentaressimo magari de una.... cinquina....
Giudita.
Oh!... Anca de una quaderna.
Cecilia.
Intanto per altro mi la ciamo Lisa, Liseta!
Lisa (c. s.).
El mio nome!... Oh, che piaser!... Oh! che gusto! Sentistu!... Sentistu!... (a Bapi).
Bapi.
E nualtri faremo altretanto.... co podaremo....
Lisa.
Speta che vado a magnarmela de basi.
Cecilia.
A pian che non me la svegiè.
