Lisa.
Ma no essendoghe, per adesso, gnente de novo, doparemoghene un pocheti per nostra nessa; dopo ingrumaremo....
Bapi (scontento).
No se fa che ingrumar senza costruto.
Lisa (p. p.).
Oh! Dopo po bisognarà che provedemo per el batizo....
Bapi.
Eh! De questo parlaremo. Vogio vedarghe ciaro, perchè go sentio certe parole.... Za se vivessi cent'ani no rivaressi mai a somegiarve....
Lisa.
Ohe! Ti sa che per sti discorsi ti l'ha ciapà ancora un papin!
Bapi.
Ma alora gerimo morosi.... e adesso semo maridai. (facendo capire che adesso picchierebbe lui)
Lisa (scherzando).
Andemo, nol fazza el cativo, se el vol che el Signor ne proveda anca nualtri.... de un sfrogno come quela.
Bapi.
Ben ben parlaremo. Ma adesso scampa che xe qua gente.
Lisa.
In merceria, in merceria. (via dal fondo)
