SCENA X.
Bòvola, come sopra, ma inviperita; Nobilomo Vidal e detti.
Voce.
Ciò, Giudita, ti starà un poco in botega anca ti, mi digo! Vara che xe qua el signor Nobilomo.
Vidal (d. d.).
Lassè là, lassè là, che in t'un salto vado mi.
Giudita
(a Daniel presto).
El Nobilomo?... femo finta de guente, sastu!
Vidal
(in pelliccia, guanti, bastoncino, cappello a cilindro; avrà un fiore nel taschino della pelliccia; sempre vispo e bonario). Ste là, ste là, crature, che no voi disturbarve. (ansando) Mostricia d'una scala, la m'ha rovinà i foli!
Giudita.
El doveva farla adasieto. E po co sto tantin de pelizza!
Vidal.
Lasseme star che la xe el mio martirio. Se no fusse per quel benedeto toso de mio fio, che ga paura che l'aria me ofenda, andaria sempre col mio tabarielo. Me piase esser libero, mi.
