corze che doparo la so roba usada, el me cria. E mi no vogio farghe spendar soldi per le mode.
Daniel
(con la pelliccia per portarla abbasso).
Galo gnente drento, Nobilomo?
Vidal.
No, vecio.... Ah! quel fior, caro vu, che me despiasaria....
Giudita.
Cospezie.... Nobilomo, me consolo!... (accennando al fiore) Gavemo le tatarète adesso!
Vidal.
Ah!... Cossa credaressi.... a sta tenera età.... Afari sì, perchè no go altre pitime sul stomego!... Alvise ga la passion de coltivar i fiori.... e ogni matina el me ne regala uno co le so man.
Daniel
(parte colla pelliccia scherzando).
Eh! La sarà cussì, sì!
Vidal
(vedendo d'esser solo con Giudita, le dice come in confidenza).
Sentì, cara vu, Giudita: saveu gnente de un anelo de valor ch'el mario de vostra nessa cerca de vender?
Giudita
(come restando in guardia).
Sì.... lo gavemo crompà de foravia e sicome xe dificile de vendarlo tegnindolo in botega.....
Vidal (contento).
Alora basta, co lo savè no ocore altro.
