Giudita.
(No vorìa che nassesse un imbrogio.)
Daniel (verso Cecilia).
Ciò, no ti vedi to mario e la signora?
Carlo
(con dolcezza ostentata).
Ma Cecilia, digo, varda: fin el cuscin per portar la picola in Ciesa.....
Norma.
Roba da gnente, sala; anzi la compatissa, comare, se fazzo cussì ala bona....
Cecilia
(che si sarà scostata dal gruppo presso al tavolino ― e andrà nel mezzo: vedendo il porte-enfant e gli altri oggetti).
Ma vardè che pecà! Me despiase proprio che la se sia disturbada per gnente. (a Carlo) No te l'ho dito che s'aveva impegnà mia sorela de tegnir la putela....
Norma
(sbalordita ― a Carlo, Giudita e Daniel).
Com'ela sta storia? Ohe, intendemose, perchè smachi no ghe ne tegnaria gnanca da mio pare s'el tornasse al mondo.
Cecilia.
Mi no so cossa dirghe, la se la intenda co lu ch'el saveva.
Vidal (in orecchio a Giudita).
Ma chi xela quela dona?
