ATTO SECONDO.
La stessa scena.
SCENA PRIMA.
Giudita, Daniel e poi Cecilia.
Giudita
(a Daniel che è seduto e ingrugnito).
La intendistu si o no che no vogio star co sta piera de mulin sul stomego? Vogio indrio quela maledeta ricevuta, a costo de restituirghe la so carta da mile.
Daniel.
Oh! sì, restituirghe! Se l'ha portada via Carlo, certo per darghe i otocento franchi ala Norma.
Giudita.
S'el ghe l'avarà za dai, me picarò a vender quele do pale d'altar per poco o per gnente: darò via de l'altra roba a strazza marcà, ma vogio cavarme de sto presipisio.
