Lisa.
Nualtri no podemo servirghe a gnente: ma se caso mai la gavesse bisogno de mi la ne trovarà sempre quei d'una volta.
Giudita.
E mi te ciapo in parola.
Lisa
(verso Bapi che vorrebbe condurla via).
Ma aspeta, crussio eterno!
Giudita.
No ti ghe xe che ti che possa cavarme dale pene del Purgatorio. Cori subito dal nobilomo e scongiurilo ch'el fazza la carità de vegnir subito qua. Ti ti xe sul so bon libro e nol te dirà de no; ma varda che so fio no senta e no vegna a saver gnente.
Bapi.
Almanco la ne diga de cossa che se trata.
Giudita.
No serve; no ghe xe tempo da perder....
Bapi.
No voria che ghe fusse qualche imbrogio.
Lisa.
Co ghe entra el nobilomo, mal no ghe ne pol esser; e po co se sa come che se stà, mai paura!
Bapi.
Ben, ben, andemo. (p. a Lisa) Ma che la sia l'ultima, sastu! (p. p. a destra)
