SCENA IV.
Cecilia e detti.
Cecilia (sull'uscio, sorpresa).
Ciò! La xe ela che me ciama?
Norma.
Perchè no vogio che siemo nemighe, e no la ga da credar che geri me la sia ciapada co ela. La me xe stada sempre simpatica, e se so mario m'avesse badà, la saria più contenta; nol ghe staria fora le note intiere....
Cecilia.
Per mi, ch'el vada o ch'el staga, no me ne importa proprio gnente.
Giudita.
E xe cussì che se desgusta i omeni: perchè se ti t'avessi regolà in altra maniera, gnanca lu....
Cecilia (ridendo).
Ah! ah! Ancuo toca anca la predica!
Giudita (a Norma).
Vedela, ela che parlava d'ingrati? Procurèghe l'impianto ala famegia, alzeve de qualche scalin e po i ve ridarà sul muso!
Norma.
No la staga a criarghe che la xe la mia cocola. La vedarà che fra nualtre se la intendaremo pulito.
