Giudita (a Daniel).
E ti movite, va a vedar se ti lo trovi fora....
Daniel.
Andarò nei magazeni dove ch'el pratica, me informarò....
Giudita.
Basta che no ti lo agiuti a fragiarli, si no te conzo mi. Fazzo un salto dal nonzolo e po torno, perchè se vien el nobilomo....
Daniel.
Ti vedarà ch'el vecio giustarà tuto, sì!
SCENA V.
Cecilia e Norma.
Cecilia (sempre allegra).
Pagaria proprio de saver percossa che i xe cussì frastornai.
Norma.
Me par che la dovaria esser frastornada più de lori a aver un mario che ghe ne fa de tuti i segnati!
Cecilia (c. s.).
Chi ne sentisse pararia che ela fusse so muger.... e mi so comare.
Norma.
Se po ghe fa l'istesso che i la meta lessa o rosta, beata ela!
