Giudita.
Da una parte me despiase, ma i me l'ha cavada de boca.
Vidal.
Una putela.... un.... Ah! busiera, fufignona.... no ve bado minga, savè! So chi xe mio fio.... e so calmo, tranquilo, vado a saludar Cecilia, a tor Lisa.... certo sicuro che megio de cussì no la pol andar. (entra a sinistra).
Giudita (subito a Daniel). E ti no star là come una marmota. Cori a trovar Carlo che za sarà dala Norma, dighe che ti sa tuto quelo ch'el m'ha dito.... fate valer, e ch'el te daga indrio tuti i soldi che ghe xe restai.
Daniel.
Ma mi veramente in casa de culìa.... e po no voria comprometarme....
Giudita.
Ara piutosto che no i te daga de bever e no i te tira zo!
Daniel.
Per sti gargàti no ghe n'è mai andà zo de quel vin! (via a destra).
