Giudita.
Sentelo, nobilomo? Dal Procurator del Re; ma anca mi svodarò el saco e....
Vidal.
Andè abasso, feme el piaser, lasséne soli do minuti. (spingendola) Andè andè e che no vegna nissun.
Giudita. So nele so man.... Lu xe una degna persona e el pol esser sicuro che no la secarò più. (via)
SCENA XII.
Alvise e Vidal.
Alvise.
Cossa gastu.... te vedo tuto agità. (sottovoce, ma con rimprovero) Percossa t'astu lassà condur qua? Andemo, andemo.... Via da sto fango....
Vidal
(quasi con timidezza verso suo figlio).
Sì, xe vero; qua xe fango dapertuto.... fora de là drento, dove ghe xe una mare.... che sarà quel che sarà.... ma la xe mare.... e una tosa bona e onesta che se vergogna de so sorela.
Alvise
(disinvolto sempre. Va a prendere la pelliccia e fa per indossargliela)
Se vede che i t'aveva ciapà proprio pulito e se gnente gnente me intardigava.... Metite su....
