a disnar fora e po' vado a teatro e patron sior lustro. Oh! che bela idea!
Bepi.
Cossa xe nato?
Menego.
Stasera al teatro Goldoni, se dà le Barufe in famegia. Una comedia che par talis et qualis quela che to mare e to mugier recita ogni giorno in sta casa.
Bepi.
Ben, e cossa me ne importa a mi, anima mia?
Menego.
No ti capissi? Dovaressimo condurle a teatro a çiò le veda el mal che fa nele famegie i contrasti, a çiò le se specia e le se cambia.
Bepi.
Oh sì, figurite! Co no le se ga cambià ai consegi, ale prediche che ga fato don Gaetano e don Bortolo, che xe i so confessori, ti voressi che una comedia....
Menego.
Cossa vustu che fassa le prediche de don Gaetano? Drento da una recia fora da st'altra. Ma la
