el caratere, xe mia madona co' quela so flema che me urta i nervi.... Ma co penso che, per no andar d'acordo, pol nasser la disunion che gavemo visto stasera.... Co penso ai dispiaçeri che se va incontro, sento che compatirò, che soportarò tuto.
Ah sì? ah?
Oh, el vedarà. E po' no so miga una mugier come quela dela comedia, mi! Anzi me par che no i dovaria metar sula scena dele done cussì cative. Xe vero che quela mugier no ga fioi, ma per aver cuor de dividerse, de lassar quela povara vecia, no bisogna aver proprio sentimento. Ma mi go un bambin, mi sento che podaria soportar tuto per elo, mi vorò anzi ch'el ghe vogia ben a so nona. La xe un pocheto secante, sufistica.... ma gavarò pazienza. Deventando più vecia la sarà forse più bona e mi la farò contenta, ghe lezarò i so libri, i so zornali, la servirò, farò che mio fio la caressa, che el ghe daga tanti basi. E co i vegnarà a casa, Bepi e lu a disnar, i trovarà tuto quieto, tuto al'ordine, la nostra caseta sarà un zogielo, piena de pase, de tranquilità, de amor, come un nio de colombi.
