Rosa.
Eh! La se calmarà, siora! E ti no badarghe e fa quel che te ordino mi.
Emilia.
Me farò badar mi.
Momolo.
Ma vedeu per che sempiessi che trovè da dir? Lassemo andar ste storie, e piutosto òrdinighe quel che la ga da tor da disnar.
Rosa.
Che la toga tanto tòssego da darghe a chi digo mi.
Emilia.
Che la toga tanti limoni per farghe passar la bile a chi digo mi.
Momolo.
(Che zornadina che se prepara ancuo!) Fame el piaçer, mama, ordina ti da disnar.
Rosa.
Mi son peso de una scoassa in sta casa, dunque no me ne intrigo.
Momolo.
Alora, Emilia, ordina ti.
