Ubaldo? Bona che el xe mezo incocalìo,1 da resto faressimo una bela figura. No ti vedi, camòma, che Betina me càlcola manco de una savata? No ti vedi, pampe, co' che aria de sussiego me trata siora Carlota e quel tàngaro de so fio? Ma cossa sogio mi? Ma co' chi crèdeli de aver da far?
Momolo.
Ti ga rason, via, trovaremo rimedio.
Emilia.
Malegnaso2 sto rimedio, lo trovarò mi una volta o l'altra.
Momolo.
Emilia... dime... ti ga dito per scherzo... de voler andar...da to papà, ah?
Emilia.
No so gnente, mi.
Momolo
accarezzandola.
Andemo, Emilia...
Emilia.
Va là, va là, che no ghe xe bisogno de sti smorfiessi. Passa dala sartora e dala modista e dighe che le me porta l'abito e el capelo novo. Dighe a Betina che la vegna qua.
