Toni.
La dovaria tàser, me par.
Emilia
in collera.
Ma che tàser? Che prudenza? So stufa e se no me gavè mai sentio a sigar, me farò sentir adesso.
Rosa.
E mi ve digo...
Orsolina
entrando insieme a Bettina e Nene e parlando in coro.
Cossa xe? Mama!
Bettina.
Cossa xe stà? Parona!
Nene.
Cossa gaveu? Emilia!
Confusione, ma ordinata e senza chiasso.
Emilia.
Mi no vado in còlera che una volta a l’ano, ma co ghe vado no conosso più nissun e so capaçe de petenarve pulito quante che sè!
