Venezia par 'na femena
Tuta vestia de festa,
Co la girlanda in testa
Che la se va a sposar.
Xe de le feste l'unica
Del Redentor la Vegia,
La xe 'na maravegia
Venezia in mezo al mar!
Varda, co bela gondola!
Eco la Galegiante:
Sentimo sta cantante
Che canta el Trovator.
Senti co vose angelica,
Che vien zozo dal Çielo!
Zanze, vustu l'anelo?
Strènzime forte al cuor...
T’impirarò in-te l'asola
De fiori un bel mazzeto;
Vien col to be moreto
Che mor d'amor per ti.
Senza de ti, mia zogia,
La vita, no xe gnente;
Quando te so' da rente,
Zanze, no so' più mì.
Dame un baseto, làssime
Basar quel to bel viso...
Xe questo un Paradiso
Che in cielo nol ghe xe.
Pagina:Gerani - Poesie veneziane, Venezia, Ferrari, 1903.pdf/30
Sta pagina la xe stà trascrita, ma la gà ancora da vegner rileta.