Sta pagina la xe stà trascrita, ma la gà ancora da vegner rileta.
XIX.
AL DOMINO
(DIALOGO FRA DO VECI TODESCANTI).
― «...(Bianca). Se stava come tanti re
Soto i todeschi!... (zoga).» ― «(Tuta bianca)»
― «Do sievoli costava 'na palanca!»
«La xe 'na verità» - «(Bianca col tre)!»
― «(El tre gà el cinque); pesca» ― «Ooo, e prima che
Vegnisse sti stranati... (ghe ne manca)?»
«(No, le xe tute)» ― «...e po de cani, gnanca
No ghe gera 'na tassa...» ― «Vero xe!»
― «Inveçe adesso semo pieni infin
Sora la testa; (zoga).» ― «(Toca ti).»
«(Col do). Tuto per colpa de Manin!...»
― «E Tomaseo.» ― «Mi, quando che li nomino,
Me boge el sangue..» ― «(El do gà el quatro); e mi?
Che squasi, squasi...» ― «(Dopio quatro).» - «Domino!...»