lui dovesse andar con le sue do galie suttile a cavar quanto fosso lui poterà cun le sue zurme per fortificar le mure del dito palazo.
El dito misser Chabriel Trivixan si fexe el suo comandamento, e stete a cavar in fina al tramuntar del sol, e da posa vene al suo statio a sorzere, e questo si fo adì 14 del mese de marzo 1453.
A dì ultimo marzo, che sun sabato santo, el serenissimo imperador si fexe uno comandamento a misser lo capetanio de le galie da la Tana, che el dovesse andar ancora uno puoco de fosso che mancava, a cumpir de cavar, azò tuto fosse forte. El serenissimo imperador volse star lui in persona cun i suo baroni per solizitar de questo cavar, e come fo ventitrè hore, misser lo capetanio si vene al porto al suo sorzador, e levosse el dito capetanio del porto el sabato avanti zorno cun le sue tre galie grosse, e andossene al chinigo, dove che bexognava cavar, e lì fo trovado l'imperador cun bona parte de la sua baronia che aspetava le galie per far cavar. Sorte che fo le galie, subito misser Aluixe Diedo si se aprexenta avanti l'imperador, e fo dado prinzipio de cavar, e comenzando i patroni, comiti, e tuti ofiziali de le dite galie, balestrieri, compagni, e tute zurme, tuti cavava de bona voia per l'onor del mundo; chi cavava, e chi portava; fo fato in questo zorno uno gran lavor, perchè tuti el feva de bona voia, et anche perchè l'imperador si steva suxo il lavor, e cussì steva misser lo capetanio, e in questo lavorar d'agnora l'imperador si feva star do varde inzima del monte per tignir a mente, che Turchi non fosse vignudi assaltar queli che lavorava; per la gratia de Dio mai non vene Turchi per fina che fo chavà le dite fosse; a la sera a compieta fo cumpido de cavar, e le galie vene al suo statio dove le jera in prima per mezzo Pera.
A dì do april, el serenissimo imperador si comandò a ser Bortolamio Soligo, che dovesse destender la cadena a traverso del porto, zoè da Costantinopoli fina in Pera; el dito ser Bartolamio Soligo per comandamento de l'imperador si destexe la cadena a traverso del porto, e questa tal cadena si iera de legnami grossissimi e redondi, e innarpexadi uno cun l'altro cun feri grossi, e cun cadene grosse de fero, e li cavi de la cadena, uno cavo si era dentro da le mure de Costantinopoli, e l'altro cavo si era dentro da le mura de Pera per più segurtade de la dita cadena. Habiando destexa questa cadena a traverso del porto, l'achade a far provixion da la banda da tera ferma, e però tuti i nobeli de Veniexia si andò da l'imperador, e aricordari che se dovesse far quatro chavi1 de le quatro porte de la tera, zoè
- ↑ capi.
