A dì diexedoto pur de questo mexe de april, vene gran multitudine de Turchi a le mure, e questo si fo zerca a hore do de note, e durò la scaramuza fina a ore sie de note, e in questa scaramuza ne fo morti asai Turchi, e quando questi Turchi vene a le mure, era scuro, e però i vene per asaltar a l'improvixa i nostri; ma no me domandè con quanti cridori i vene a le mure, e de so sonari de nacare, che parea fosse assai più Turchi de quelo i se trovava ad esser, in fina a la Natolia fo intravignudo el cridor so, che sono mia dodexe lutan da lor campo; e in questo gran cridor, el dolente e mesernelo imperador si comenzò a pianzer dubitando che questa note i non volesse lor Turchi dar bataja zeneral, e perchè nui cristiani non eremo ancora provisti de aspetar bataja zeneral da lor Turchi, e però questa sì son la gran doia che avea l'imperador. Ma l'eterno Dio non volse sofrir tanto scandolo in quela fiada, ma a ore sie de note tuto fo bonazade le scaramuze cun lor granda so vergogna di pagani, e ancora so grandinissimo dano, perchè ne fo morti de lor largamente da duxento in suxo, e gratia de Dio, di nostri non ne fo morti niuno, nipur ferido.
A dì vinti pur de questo mexe de aprile a ora de terza, avessemo vista de quatro nave grosse, che vignia suxo per il dardanelo da ponente, le qual vigniva da Genova credese, e vignia a Costantinopoli per dare soccorso a la zità; etiam vene per uno comandamento che fexe el serenissimo imperador de Costantinopoli a Zenovexi, che zascaduna nave de Zenovexi, che vignisse per secorso de Costantinopoli, e quele fosse carghe de che sorta marcadantia se voia, fosse liberamente franche tute marcadantie de ogni gabela aspetasse a l'imperador. Vignando a vela le dite quatro nave con ostria1 fresca, e d'agnora quele aproximandose verso l'angusoxa zitade, e come piaxete a Dio, quando queste quatro nave fo per mezo la zitade de Costantinopoli, subito el vento i bonazò, e trovarse le dite nave esser in gran bonaza; siando romaxe quele in bonaza, l'armada da mar de Machomet bej Turco perfido a la fede cristiana, si se mosse cun gran vigoria de anemo, la qual armada si se trova esser sorta a le colone, e con gran sonari de nacare, e cridori si vene verso le quatro nave con una vuoga rancada2, come homeni volonteroxi de aver vitoria contra el suo inimigo; ma pur non i zova a pregar el suo Machometo che i desse vitoria; anzi le pregiere de nui Cristiani, el nostro eterno
