posa che i ave cavà queste bombarde del monte de Pera, i le mise a una ponta che vignia a bombardar una porta, la qual se chiama el Chinigo, uno luogo che son verso el palazo del serenisimo imperador, e lì questi turchi ne tré una gran quantitade de bombarde, e mai non potè far niuna cosa de mal, e da posa1 queste bombarde le tirò via de quela ponta, e misele a le mure de la tera apresso de le altre, a bombardar la zitade, a san Romano, dove che iera el più debele luogo de la tera, e dì e note, mai queste bombarde non refiniva de trà in queste puovere muraie, d'agnora butando asai mure per tera, e nui de la tera d'agnora dì e note fazando de boni repari, dove che iera roto le mure, con botami, e brusca, e teren, et altre cose nezesarie a quela cosa, per muodo che el iera cusì forte come quaxi da prima, per muodo che per quel romper non aveemo paura de lor turchi. Ma a quela porta che iera più rota cha le altre, nui avevemo messo per bon secorso de quel luogo homeni trexento ben in ordene de tute sue armadure, i qual homeni tuti si iera forestieri, e non griego niuno, per esser lor griexi vil d'anemo, e questi trexento homeni si i avea apresso de si2 de bone bombarde, e de boni scopeti, e balestre asai e d'altre cose per questo fatto. —
A dì quindexe pur de questo mexe, de mazo ni da mar, ni da tera non fo fatto movesta niuna de bataia, salvo le bombarde, che mai non refinava de dar in le mure, e nui, subito rote le mure, fevemo i boni provedimenti de repari con i suo fosi dentro via come ho dito. In questo zorno i turchi si stete forte quieti in nel suo campo, e nula scaramuzò intorno le muraie che i soleva far. —
A dì sedexe pur de questo mexe de mazo zerca a hore vintido, el vene alguni bregantini de turchi, i qual se partì da la sua armada, che iera a le colone, e questi tal bregantini de turchi si vene a vuoga batuda per infina a la cadena del porto, e nui cristiani che ieremo a la cadena stevemo aspetar queli con gran apiaxer, pensando che i fosse cristiani che scampasse da l'armada del turco, e che volesse vignir da nui per più segurtà; e come i diti bregantini fo arente la cadena del porto, i scozò algune bombardele verso le nave che steva a la cadena, e nui da mar, quando che vedessemo questa cosa fatta fentizamente, deliberassemo de dare driedo cun nostri bregantini; e come turchi si vete, che i nostri i deva driedo, i se mise a scampar via, e i nostri pur dagandoi3 la fuga, intanto che4 queli fo azonti, e azufosse
