El dito bastion, si iera come aldirete. Prima quelo si iera de legnami forti, e investido tuto atorno de cuori de gambelo1, e cusì si iera el suo cuverto, e dentro iera fina a la mitade pien de tera, e cussì ierelo de fuora via, fina a la mitade pien de tera per muodo, che bota de bombarda, ni scopeto non li podeva nuoxer, ni vereton, et avea messo de fuora via e de sora per tuto, gradizi, i qual si steva de sora le pele di gambeli, et avea ancora fato una strada, che andava al campo, ben mezo mio de longo, comenzando dal bastion, da uno ladi e da l'altro, e de sora si iera gradizi dopii, e de sora via si iera pele de gambeli, per muodo che i podeva andar dal bastion al campo de soto via al cuverto, che niuno non i podea nuoxer, ni de scopeto, ni de vereton, ni ancora bombarda pizola; e i turchi che iera dentro dal bastion si cavava de la tera, e butava dentro dai fossi, e vegnivei a terare2; in tanto aterar che i fexe, i vene a soperchiar le mure di barbacani, e questo bastion si dè uno gran aiuto a turchi de aver questa zitade, sì come intravene. Turchi del campo abiando fato questo bastion sì mirabele, e abiando aterado tuto el fosso, dove che iera el defitio, se tene esser loro avenzadori, sì che per questo zorno altro non seguì, ni da tera dì e la note, nì da mar. Ben è vero, che turchi buttà in questo dì assai freze dentro da la tera, dal luogo che iera el bastion; quaxi i treva per una alegreza del campo, e i nostri tuti si romaxe forte melinconichi da paura.
A dì diexenuove pur de questo mexe de mazo, i diti e malvaxi turchi pieni de ogni iniquità, se inzegnò, e feze con efeto uno ponte, che traversava el porto, zoè dal teren de Pera, fina a la banda de Costantinopoli, suxo la palixada, el qual ponte si iera fato de botte grosisime, e ligade una arente l'altra, e puo' de sora via de queste bote si ne iera travi longhi e ben ligadi uno con l'altro, per muodo che el iera uno beletisimo e forte ponte, e questo ponte il tene cusì fatto, e apariado, per doverlo destender a traverso del porto in nel zorno de la bataia zeneral, azò che quelo vignisse a dar piui bataia a la tera, et anche i fexe questo per caxon, che se sparpagnasse più homeni atorno la tera, azò che lor turchi più tosto avese sua intention, da la banda de tera, dove che le mure si iera butade per tera da le bombarde; si questo ponte fosse stado destexo a traverso del porto avanti la bataia zeneral, una sola bota de bombarda si l'avaria roto, e tuto
