taiada la testa, e queli so corpi si fo butadi zoxo de le mure da la banda da tera, dove che iera el campo del turco; e lor turchi, che vete questi so turchi butadi zoxo de le mure, si l'ave forte a mal, e desdegnosse forte verso griexi, e nui taliani. Pur ancora in questo medemo zorno a una hora avanti zorno vene uno bregantin suxo per el dardanelo, el qual bregantin si iera armado de vestimenti a la turchesca, e i è sta stado questo, mandado in l'arzipelago per iscontrar la nostra armada, che vignisse tosto suxo, e dire che Costantinopoli ancora se tegnia forte. Ma l'armada del turco, che iera sorta a le colone, sentì a remizar questo bregantin fortemente, e dubitò non fosse qualche antivarda de la nostra armada, perchè lor si saveva ben che quel non iera fusto de turchi, e però la dita armada del turco, si se mosse da le colone, e vene in ver questo bregantin; ma come questo bregantin si fo per mezo la cadena del porto, a quelo i la fo averta, e intrò in porto con salvamento, e l'armada del turcho vedando questo, i retornò in driedo con tuta la sua armada, e andò a sorzer al suo luogo uxado, ma nui de l'armada nostra tuti si iera a le sue poste, e armadi a muodo uxado, per dubito, che la dita armada del turco, non devegnisse a investir a la cadena, (e) stessemo tuti in arme per in fina a una hora e meza de zorno, e poi tuti se dexarmasemo; altro per hozi non fo, ma ben per la tera iera uno gran campana martelo, per asunar persone a la marina per dubito de l'armada, come vi ho dito. Da tera avessemo ancuo1 asai bombarde in le mure, e butò zoxo parechi passa de muro, e tosto nui fevemo otimi repari; per questo zorno avesemo gran travaio, e afano asai cusì da mar, come da la banda da tera dal campo. —
A dì vinti quatro pur de questo mexe de mazo, a hora de mezo zorno, si fo trovada una cava a la Calegaria pur arente le altre cave uxade, e questi malvaxi turchi si avea messo mezza tore in ponteli, e zerca passa diexe de muro, per dover cazar fuogo dentro, azò quela cazèse per poder subito intrà in la tera. Ma el nostro signor dio non volse sofrir tanto mal per quela hora, e non volse che la zitade se perdesse per quela via. Come griexi si ave trovada questa cusì estrema cava, e subito quela i comenzò a cavar, e muròla prestamente, e fela forte assai, quaxi come da prima, per muodo che (di) quela più non iera da dubitar. Questo zorno turchi si ne dè uno gran impazo a le mure da tera, e de bombarde, e de scopeti, e freze senza numero, sì che avessemo una mala e pexima zornada. Da mar avessemo fastidio niuno, ma
- ↑ quest'oggi (hanc hodie).
