.jpg)
Da la casa de Giulieta
dove un giorno i t’à portà,
parti, cori, che i te spela,
la montagna t'à ciamà.
Torna su par i sentieri,
respirando l’aria fina,
torna là co i to pensieri
su la neve montanina.
Le cansone de na volta,
le canson de i montanari,
là sul monte, senti, scolta,
che le torna su i altari;
su i altari de madone,
chiete, dentro a i capitei,
de la casa le parone,
fata su con dei quarei.
Ma cos’elo che te guardi
o campana benedela?
Cori, presto, se fa tardi;
no te vedi che i te speta?
Cosa i è quei çimiteri
che na volta lì no gh’era?
I è sta i omeni de ieri
che sul Grappa à fato guera.
I è sta i fioi de la to tera
che i s’à messo a sentinela,
che i cantiva verso sera
la canson par la so bela.
L’è sta el sangue de i vint’ani
che l’è corso lì a fermar
le pretese de i vilani
che i volea pianura e mar.
