Quanto el voler le cosse utile, e sane
Megio saria, che le nocive, e prave!
O quanto megio el comodo sarave
160Andar cercando, e nò l'usanze vane!
In pè d'una bereta, e d'una stola,
Utile più no' n'è un capel, i se piove?
Chi è quele boche maliaze, e love,
164Che me possa mentir mai sta parola?
E pur chi andasse in Corte de Palazzo,
Senza la toga, e col gaban de griso,
Comoveria tuta la Piazza a riso,
168E che mal saria questo? O che Mondazzo!
E perche dal mal tempo, e dala piova
No' m'hò da reparar, senza agrizzarme?
Che miseria è la nostra? hò da bagnarme,
172Per no' far cossa oltra l'usanza, e nova?
O, se piove, stà a Casa. El sò anca mi,
Che no' me bagnerò, se resto in drio:
Ma, se far me bisogna el fato mio,
176Me sarà de vergogna el far cussi?
