Questo è l’honor, che tanto el Mondo stima?
L’è una boria ventosa, un’albasia.
Forme, che mete molti in fantasia
220D’esser spazzai per homeni de cima.
Eh, che del vero honor l’inteligenza
Ben no’ l’havemo. E no’ la sta in haver
Casta de corpo, e savia una Mugier:
224Altro è l’honor, bisogna haver pazienza.
No’ digo miga, che sia ben l’haverla
Putana. O guarda Dio! Che songio mato?
Ma come l’Homo sia desonorato,
228Se l’ha, sta cossa voria ben saverla.
Cossa è sta cossa? se la Dona peca,
L’Homo da ben donca sarà un’infame?
Un Castronazzo? un pezzo de motame?
232Dove semio? (dise) Semio ala Meca?
Suposto, che’l Mario no’ fusse reo,
E fusse la Consorte una ladrona,
Chi saria quela razza sfondradona,
236Che, come ladro, ne’l mostrasse a deo?
