Perche aprovar sta leze? e perche farla?
Habia la pena el Reo, nò l'inocente.
Ma, se l'havemo fata strambamente
260Strambamente bisogna anca osservarla.
La virtù, l'inocenza, el bon costume,
El viver quieto, el termine modesto
S'hà da honorar: che'l vero honor xe questo.
264E d'honor tuto el resto, ombra, e barlume.
S'hà da cavar piu sustanziosi i sughi,
Che se puol dale cosse, e bon costruto
Cercar dovemo, e utilità da tuto,
268Cusinar neto, e no' far mai pachiughi.
Del resto vaga pian, camina in pressa,
Fazza quel, che ghe par, vesta a so' modo,
Pur ch'habia l'Homo intendimento sodo,
272Libertà doverave esserghe amessa.
Vedo che de vegiar sè strache, ò Muse:
Ve casca le palpiere. Ande (v'esorto)
A tior dal sono el debito conforto.
276Manca l'ogio al stupin: smorzo la luse.
