Fin de le vostre sordide fadighe
Sarà biasmo, desprezzo, ingiuria, e sdegno,
E, al vostro meritar premio condegno,
140I vostri Heredi ve farà le fighe.
No ghe sarà nissun, che, per tristezza,
Portar vogia el corotone, se 'l lo fesse,
Per uso el lo farave; e se 'l pianzesse,
144El saria un lagremar per alegrezza.
Pagherè al fin de le ingordisie el fio
Vù, che cerchè tra l'oro i Campi Elisi:
Che per vù nò se averze i Paradisi,
148O ingrati à l'Homo, à la Natura, à Dio.
Perche quel'Homo, che ve honora, e lauda,
Ve seguita, ve serve, e ve obedisce,
Soto i vostri ochi (ò crudeltà!) languisce?
152La mercede cussi se ghe defrauda?
S'un, che ve vogia ben, se un vostro Amigo
De quel, che ghe bisogna hà mai mancanza,
Perche no l'agiuteu, se ve ne avanza?
156Perche no 'l libereu da qualche intrigo?
