Se fa brutta la bela, e istolidisse
Una dona de spirito, che un zorno
Gera come un prodigio circondada
Da una fola de Amanti amiratori!
La me invidia perchè me fasso sposa?
Chi pol decider se per questo aponto
Merito invidia più che compassion?
Nol so ben gnanca mi. Confusa passo
Dala speranza che me vol contenta
Al timor che me afana e sbigotisse:
E ancuo me sento per el cuor un certo
Bisegamento che n’ho più provà!
Zaneto me vol ben: Zaneto ha un cuor
Che pol render felice una Muger.
Sposandome con lu, lasso una casa
Dove un Padre, aciecà dal avarizia
Se desmentega el sangue, e la Natura,
E me tien tra i bisogni come schiava
Più che in conto de fia: vado in tun’altra
Dove un Missier inamorà de mì
Coi brazzi averti, e con tanto de cuor
Me aspeta per remeterme el possesso
E ‘l manegio de tuto! Cossa, donca
Gastu, Anzoleta, che no ti è contenta?
Ah! Quela maledetta zelosia
Ch’el cuor’orba a Zaneto, e per la qual
Mile spasemi ho audo da soffrir,
Sì questa, questa causa el mio timor,
Questa me pressagisse mile afani
E me lazzera el cuor, e me despera.
Coss’oi donca da far? No ghe più tempo!
Le circostanze, e più de tuto el cuor
