Pien de Amor, pien de smania che siè mia
Car’Anzoleta, son vegnù da vù.
Anz. Caro Zaneto, me despiase solo
Che v’averè strussià. Sè tuto un’acqua.
Caveve zo, che ve farò netar
El bergonzon. Lassè. Uh! uh! che macchia!
Zan. Eh gnente, gnente.
Anz. Come l’altro zorno
Certo no la gavevi. Caro vù
No me petè busie. Vù sè cascà
E vè sarè a un bisogno, fato mal.
Disè la verità.
Zan. Gnente ve digo......
Anz. Sior no, vogio saver.
Zan. Eh via fredure!...
Anz. Sior no, ve digo.
Zan. Ma se ben curiosa!
Anz. Me par mo, Sior, che stà curiosità
No dovaria despiaserve pò tanto.
Zan. No; ve son’obligà, car’Anzoleta,
So che per mi gavè buon cuor.
Anz. Buon cuor?
E gnente altro? Gò buon cuor per tuti.
Zan. Per tuti?
Anz. Si per tuti, e me ne vanto.
Ma me pareva per el Sior Zaneto,
E credeva che a st’ora el lo savesse,
De aver qualcossa de più, che buon cuor!
Zan. Cara, me consolè. Non andè in colera.
Perdoneme, ve prego, e ve sodisfo.
Xe vero, son cascà. Gò i stivai novi,
Ò sbrissà do tre volte dalla pressa
