Lug. A monte, siora,
A vù no se ve speta de parlar
So mì quel che farò! Ch’el vegna pur
Ch’el me vegna davanti! Oh vogio certo
Farme sentir.
Luc. (Che bestia!) da se.
Lug. Se ghe fusse
Qualcun de sesto za sarave andada:
E col vegniva, l’averia imparà
El Sior Conte del diavolo ch’el porta
In che modo se serve le mie pari.
Luc. Ghe xe qua Sior Tonin...
Lug. Cossa voleù
Che sapia quel Pandolo vegnù fora
Gersera de Colegio? Nol sa gnanca
Far la scala.
Ton. Oh Sior-Amia, si dasseno
Che la so far. O avudo finadesso
Diese lezion, e sono el menueto.
Lug. Tasè, Sior scempio; no averzì la boca
Che no disè un sproposito.
Ton. Ma Siora,
La me fazza portar mo qua el violin;
Ghe la farò sentir.
Lug. Via, tasè la;
E no parlè se no velo comando.
Luc. (Oh che Puto de sesto!) da se.
Ton. Taserò.
(Anca a casa in silenzio? No credeva!
No ghè altro de bon quà co Sior-Amia
Che no ghè scola, e che se magna ben.
Ma gò una suggezion!) da se.
