Mat. Vastu in colera?
Vien quà Nadal. E quela cassettina
Dove la gastù? come sopra.
Nad. Dove ve gò vù.
(Andarò via per no precipitar!)
da se parte.
SCENA V.
Sior Matio che resta a sedere poi Zaneto,
e Anzoleta.
Mat. OH! oh! Senti! vien qua, Nadal! Nadal!
come sopra.
Oh che gusto! Mai più tant’ò ridesto!
Co trovo Avari, me li godo tuti
Tuti cussì! No darave sto gusto
Per tuto quanto l’oro de sto Mondo!
Bondì Anzoleta. Stastu ben? come sopra.
Anz. Sior sì.
E elo, Sior Missier?
Mat. Oh! Sempre mejo.
Te fala mal la pipa?
Anz. Eh gnente, Sior.
Zan. Eh un pocheto, Siorsì.
Mat. Mo dilo subito. getta la pipa.
Dime, Anzoleta, vienstu volentiera
A star in casa mia?
Anz. Se volentiera
No ghe vegnisse, no ghe vegnirave.
