Ognun pàlpita e sospira
Per quel tal che più ghe preme,
E tremante l'ochio el zira,
24Perchè in còa lu se lo teme.
L'atenzion ai Regatanti
Tuti porta in ogni sito:
Ghe fa angossa ai circostanti
28Quel teribile conflito.
Ma za queli de la sfida
Bada sempre al so mestier:
Che se pianza, che se rida,
32Eli tende al so dover.
Ogni Bravo spenze a forte
Quando curvo, e quando alzà,
No pensando che a la sorte,
36A la qual incontro el và.
Sfende l'acqua, che resiste
Del so remo la paleta;
Ma lu fraca, preme, e insiste,
40E più core la barcheta:
E fra l'onde e fra la spiuma
Che fa i remi nel vogar,
Za da l'ochio la ve sfuma
44Che incantài dovè restar.
Se sta i Prodi da vicin,
E se disputa la gloria
Cussì ben, che sin al fin
48Resta in dubio la vitoria.
