Segno evidente che nol se recorda
L’aviso, che ga dà Felicità.
Ma el vechio intanto el so istrumento incorda,
E po el ghe dise: Duca, el tempo è qua.
Per un bel pezzo ti ga da la corda;
Ma dai, e dai, alfin el t’ha cucà...
E apena che ’l lo toca cola falza,
Al’altro mondo el nostro Duca sbalza.
Felicità l’intende con dolor;
Ma no la vede più che agiuto darghe.
Zefiro el trova morto co stupor;
Ma gnanca lu no sa più cossa farghe.
Sepelimolo almanco con onor,
Dise Felicità, e la fa farghe
Un mausoleo de marmo de Gaeta.
La fiaba xe finia: Bondì Fiozzetta...
E la moral? mi sento che disè,
E la moral, sior Santolo, dov’ela?
Che moral me troveu? No la vedè?
Peraltro vegnì qua, che se’ putela.
S’esser felice vu desiderè,
No curè d’esser ricca, svelta, e bela:
Ma sobria, savia, onesta, e religiosa,
Restando puta, o deventando sposa.
