LA
VERA FELICITA'
OTAVE
Che ve conta una fiaba vu volè.
Cara Fiozzeta mia? Spetè un pocheto;
Perchè no so, ben mio, se vu sapiè,
Che de sta roba poco me dileto.
Dele fiabe a cassoni ghe ne xe,
E assae ghe n’ho sentio da puteleto;
Ma le fiabe rovina in pien la testa:
Nonostante senteve, e sentì questa.
Nel’ano setecento, e vintidò
Regnava in Mosca un Duca assae garbato;
Che nome, ch’el gavesse, no lo so;
So ben, ch’el gera zovene, ben fato,
Generoso, e prudente; ma però
Per la cazza dei cervi tanto mato,
Ch’altro piaser al mondo nol gustava;
E spesso in mezzo ai boschi el se trovava.
