E po' un saco d'encicliche e decreti
E suore e Deputati e Senatori
Che me vien a contar tuti i so peti,
E co sto tananai de secatori,
Gh'è chi trova da dir se in sti verseti
Me scampa de le fresche e dei erori!
Sti critichi vorìa vederli lori
A sfiorizar vocaboli coreti,
Co'st'infinita turba d'indiscreti
Vol grazie, vol dispense, vol favori!
Che i se prova, i purissimi scritori,
A rimarme secondo i so prezeti,
No digo un canzonier, ma do terzeti,
In presenza dei Padri Inquisitori!
I Arcadi stessi che i xe pur pastori,
I smete de cantar, sia benedeti,
Co' el mite Alfesibeo petùfa Clori;
E voressi che mi, che i miei conzeti,
No falassimo mai? Ma cari siori,
Pasquin istesso no li fa perfeti!
El mio predecesor, che Dio l'aceti
Ne l'alegreza dei beati cori,
El scriveva el latin come i poeti
Del tempo dei romani imperatori.