E se in tera ghe xe de sti calori,
Figurarse l'inferno!
Che gran meditazion pei pecatori
E anca per el Governo!
Basta! A Venezia almen nel caldo grande
E ne l'ore più ingrate
Giera paron de metarme in mudande
E de andar in zavate.
Ma qua!! Solo che slazza i centurini
Del mio donzelon bianco,
Ecco m'ariva adosso i pelegrini
De Maròstega in branco.
E qua ciàcole, inchini e discorseto
Con l'aria de bravura...
Lo so; bisogna farghe un zerto efeto.
Ma, Dio, che secatura!
E dopo, straco morto e malcontento
Come un can bastonà,
Togo l'Oservator per farme vento
E casco sul sofà,
Pensando con le lagrime nel cor
Che l'altra note zerto
Tuta Venezia andava al Redentor,
Che ghe giera el concerto,
E foghi artificiai sui galegianti,
Lumiere in ogni posto,
Alegria, libertà, stendardi, canti
E assae polastri a rosto.
