Diese inverni de più, Giaçinto, ormai
Ne pesa adosso, e par ch'el tempo svola,
11E tuto cambia ai nostri oci cambiai.
Semo ancora nel fior de zoventù,
L'arte ancora ne ride e ne consola,
14Ma l'alegria de un dì no torna più.
2
Te recórdistu, amigo, i cari dì,
Che se zirava alegri tuti do
Senza quasi saver dove, su e zo,
4A brasso, adasio, ore ore, cussì?
Se viveva de sogni, alora, e mi
Più assae de ti che manco testa go,
Çercava far del to bon senso pro,
8E me sentiva forte a fianco a ti.
Che bei zorni, Giaçinto! nissun re
Gera più grando e libero de nu,
11Via per Venezia o queti in un cafè.
Giaçinto mio, quel bel tempo xe andà;
I sogni, i sogni mii no torna più,
14E son zovene... e pur tanto invecià!
