Pagina:Le Rime Veneziane e Il Minuetto.djvu/252

TITA

Parcossa?

NINA

Gh'è qua arente un festin... Soni e canti,

Figuréve che gusto!

TITA

El carneval xe avanti

E la zente ga furia de divertirse...

NINA

Bona

340Che no go sòno e lezo fina che i canta e i sona.
Ma vu, vu gavé sòno... se' tuto imusonà...
Eh! volé far el zovene a quela cara età.
Curéve, abié premura de vu, no dovaressi
Far tanto tardi...

TITA

Nina, lassémo sti sempiessi

345Me sento sempre zovene co son viçin de vu...

NINA

Cossa voleu mai farghene de quela zoventù?...

TITA

Sempre cussì se' stada... giassa come un sorbeto.
E la ciamé amiçizia...

NINA

Sicuro, e vero afeto.