X.
In pope, in pope! avanti, barcarol!
Portime in ziro per la mia laguna.
Fra nuvole de rosa more el sol,
E spunta quieta e palida la luna.
Che bavesèla fresca! che divina
Note! zirar insieme co' la Nina.
Le stele in çielo tute se raduna,
Ma la più bela zìra la laguna.
XI.
Tuti me dise: "sposilo quel Piero,
Che 'na gran dama ti deventarà.
L'è un poco brontolon, l'è un poco fiero,
Ma zogie e bezzi, Nina, el te darà."
"No - ghe rispondo - sposarò el mio Toni,
Che no ga onori, che no ga milioni.
Val megio un povareto belo e bon,
Che un milionario bruto e brontolon."
