signor giera el Signor, el secondo giera San Piero, e el terzo giera San Zuane. E ti gà visto che man ch’el gaveva: quela giera la man che ti gà strucà, e invesse de strucar la man a la sposa, ti gà disturbà San Zuane.» —
III. — De dô compari de San Zuane che i gà giurà in nome de San Zuane.
No xè tanti ani che quà in Venezia ghe giera dô compari de San Zuane, e sti compari giera un toco de tempo che no i se vedeva. Un giorno, fra i altri, i s’incontra tuti dô, e uno de lori el dise: — «Oh, San Zuane benedeto! Quanto tempo che xè, che no se vedemo!» — L’altro ghe fa anca lu un pochi de complimenti, e pò i dise: zà che s’avemo catà, andemo a marenda assieme. Là i va a marenda assieme, e, co’ i gà finìo da marendar, se alza suzo uno de sti compari, e ’l va a pagar el conto senza che st’altro se n’incorza. St’altro, dopo, el dise: — «Ciamemo e paghemo, che pò anderemo via assieme.» — Dise el primo: — «Quà no ghe xè gnente da pagar, che xè tuto pagà.» — Alora ghe dise st’altro: — «Zà che ti gà volesto pagar tuto ti, ancuo oto tocarà a mi.» — E i ciapa su, e i va via. Co’ i xè per lassarse, i se ritrova su ’na cale che fasseva crosera, e là i se ferma e i discore, e pò, el compare che no gaveva pagà, dise a l’altro: — «Dunque, a rivedarsi ancuo oto quà su sta crosera, a l’ora istessa.» — «Sì.» — «Parola de San Zuane de no mancar.»
