Parla el mulo Tunin
Mi per el studio no go zerto amori
E no me importa de restar un mus,
Al pandolo, ale lavre e se go bori
In logo sconto un colpo de bancus.
Me la blangio saltar per le batele,
Far dispeti ala gente, tirar scoi,
Andar sonar de sera campanele,
In trapola ciapar i pagnaroi.
D'istà, discalzo corer per la strada,
Ale done del pan becar la biga,
De quando in quando far una nudada
Coi vestiti in mastela fin la diga.
Co capita le guardie, come mami
Le resta nel veder sta furberia,
— Ciò mulo! ma va là, lasso che i dami,
Svelto come un dolfin ghe filo via!
Co vegno in tera po, sbati sior Ana
Che magnaria, ve giuro mi, per trenta,
E magno come un lupo; xe una mana
Quei fasioi, quele fete de polenta.
