Sta pagina la xe stà trascrita, ma la gà ancora da vegner rileta.
Ai me Soneti
E quando, o versi mii, su le manine
de le done de cuor mare fortuna
sarà par calumarve, come in cuna
ghe stà un bambin fra piume molesine,
stè atenti ben se pòvare o meschine
svegiè impression, o pur se qualcheduna
a mi, pòvaro fio de la laguna,
co le maniere bele e le beline,
dar me podesse un poco de conforto.
Stè atenti ben, fioi mii, parchè la dona
co la ga leto ben, la xe anca bona
de farve intrar, o no, sicuri in porto,
che nata a la bontà, nata a l'amor,
coi oci lese e giudica col cuor.