In Montagna
Se sora a 'na montagna l'èssar mio
podesse trar, come go sempre in mente,
al mondo intiero e tuta la so zente
ghe lassaria de cuor un bel adio.
I me dirìa: che tipo inconcludente,
che gusti, che passion da inseminìo!
ma mi rispondaria subito adrio
che no se pol spiegar quel che se sente.
Me pararia che essendo là de sora
in mezo a la natura silenziosa,
se me slargasse el cuor de zorno in ora
e l'anema lassasse ogni dolor;
me pararia de lèsar, su ogni cosa;
quà nasse poesia, quà cresse amor.
