Svegiarin
Stava lesendo un dì la biografia
de un certo tal, me par d'un tal Byron,
quando a interòmpar la letura mia
ga bastà gnentemanco che un moscon.
Go dito subito: corpo de dia,
me vienstu a dir qualcosseta de bon?
Meto da novo el libro in libraria
e me incamino verso del balcon.
In quel momento stesso el campanelo
sento a sonar co forza: Ciò, Catina,
varda se gh'è 'l postier, cala el çestelo.
Defati el gera proprio lu, el postier,
che, drento de na busta pagiarina,
portava un svegiarin del calegher.
