Telegrafo senza fili
Chi xelo mai sto caro sior Marconi
che presentar vorìa 'na novità,
quando inveçe anca i gnochi, anca i mincioni
prima de lu ghe ne saveva za?
No se saveva za in tuti i cantoni
che senza el filo anca l'amor se fa,
basta 'na tosa co un bel par de ocioni
davanti a un pampe coto, inamorà?
Mi so che co fasseva mi l'amor,
dai balconi de casa, co la mora,
anca in lontan se se leseva el cuor;
e tanto ben se se capiva alora,
che ogni promessa gera presto un fato...
e Marconi no gera ancora nato.
